本港銀行近年好興瘦身，分行cut完一間又一間，但對於推廣體育活動，則義不容辭。中銀香港原來已經連續四年，贊助港九中學嘅運動比賽，噚日喺女拔萃搞嘅「紫荊盃」頒獎禮，就搵咗律政司司長黃仁龍做主禮嘉賓。司長致辭時話，今屆世界盃成日爆大冷，德國、巴西、英格蘭嘅死硬fans，𠵱家終於可以唞吓。佢話自己冇邊支心水球隊，但就好欣賞頂級球星嘅表現，仲點名力讚施丹寶刀未老同碧咸嘅精采斬球，就算自己隊波技術唔係咁勁，都要踢場好波，盡咗力就無愧於心。
不過，最令八方驚奇嘅係，讀番書嘅仁龍仔，竟然引孔子嘅「見人善，即思齊，縱去遠，以漸躋」勉勵學生要不斷自我反省，力求進步，堅持信念，neversaynever，話好似珊珊玩滑浪風帆咁，最終都可以攞到奧運冠軍。