侍仔：聽晚就有季軍戰睇啦，但呢場波我就唔想睇，歷來季軍戰都唔係焦點所在。
招積域：季軍戰都係畀4強出局分子玩吓啫，好多球隊去到季軍戰已經無心機打，冠軍又拎唔到，要個季軍做咩呢？
季軍戰球迷唔着意
菠蘿文：呢個又好正常，畀你都只係想拎冠軍啦，季軍喺呢個時刻都只係「好過無」咁解，所以球迷都唔會太留意季軍戰啦。
費迪高：但第1次踢季軍戰唔係應該醒神嘅咩？
招積域：你指葡萄牙？葡萄牙喺66年都打個1次㗎啦，仲贏前蘇聯2:1㖭。但見佢哋輸畀法國0:1之後，球員無咩太過悲傷神情，可能已經放開晒踢啦，佢哋聽晚對德國可以贏到。
侍仔：每1屆世界盃都有好多金球又或者美妙撲救，但今屆好似無咁嘅？
招積域：教練鍾意防守足球，波就梗係入少咗㗎啦，今屆每場平均入2.3幾球，即係場場都「細」，無波入點會有金球？有邊球靚㗎？數來數去咪又係祖高爾同麥斯洛迪古斯嘅「窩利」。美妙撲救？你唔係又講列卡度丫話，撲12碼靠運氣。
保方守龍門具自信心
費迪高：12碼都唔係靠運㗎，列文咪又係靠高普基幫佢捉路，仲有得臨場睇notes㖭！最令我深刻，都係保方連個頭都唔要去撲，意大利入決賽多得佢。
侍仔：班學生羨慕死列文，臨場考試有貓紙睇！
費迪高：不過睇保方同列文守龍門真係學到好多嘢，不論龍門企位定係顯露應有嘅自信心。
侍仔：其實德國踢季軍戰，戰意絕對唔會比葡軍差，話晒主場，點都要拎番個安慰獎先對得住自己。
文：高洛文