Crossover呢個熱潮睇怕都有排玩，最新例子係聯想同可口可樂合作，出咗部天逸F20系列嘅可口可樂筆記型電腦（圖），機面仲印有奧運五環標誌，係全球限量珍藏版，可口可樂咁多fans，相信呢部鮮紅色蓋面嘅筆記型電腦會係新目標。 其實可口可樂今次同聯想合作，目標唔係為「樂」迷加多個收藏品咁簡單，飲品市場競爭激烈，要鞏固地位，最好透過年輕人上網嘅習慣，利用本身品牌嘅網絡，將社群緊密連繫。所以呢，今次都係想為可口可樂喺中國發展iCoke網站鋪路，話唔定第日同聯想有更多合作。