香港管理專業協會（HKMA）噚晚喺洲際搞飯局，筵開四十幾圍，頒發優質管理獎畀得獎企業，身為評判團主席嘅李國寶，成晚淨係孖住主禮嘉賓花旗陳子政（TC），兩個人成晚「出雙入對」，鬼咁好傾。
耳仔可開關?
但寶哥哥對住老婆潘金翠就唔同喎，兩人前後腳到場不特止，見到面都冇乜兩句。
幾十個職銜在身嘅寶哥哥，一到場就俾大班傳媒追問，皆因銀行、電盈（佢係獨立非執董，有份開賣仔會議）都關佢事，搞到佢拖住TC做擋箭牌，急急腳走入貴賓室避難。
之不過，寶哥哥見慣大場面，同TC喺貴賓室斟咗一輪之後，兩個又孖住出嚟答問題，你一言我一語，回應點應付滙豐延長周末辦公時間；最後仲好鬼醒目咁，將個波拋去全港最多分行嘅中銀。講銀行佢都應你兩句，一問到電盈就乜都聽唔到。
政府都有份
講番個頒獎禮，今年已經係第15屆，政府機電工程營運基金呢勻就威到盡，事關攞咗個金獎，而其士富居物業管理及顏寶玲間飛達帽業，雙雙奪銅，活思環保包裝就攞到中小企特別大獎。
李華華
讀者如有任何意見或報料，歡迎發送電郵至[email protected]。
