中央不斷出口同出手打壓樓市，但主要係針對住宅，目的係想降溫，其他環節受影響極輕微。睇吓上海嘅甲級商廈市場，租金仲創出新高㖭。
高力國際華東區常務董事翁琳話，𠵱家上海甲級商廈每方米日租已經達到1.01美元（即每呎月租約22蚊港銀），係97年以來嘅新高。佢補充，上海商廈市道喺99年跌到谷底，之後幾年都係喺每米每日租金0.6至0.8美元水平上落，今次升穿1美元，係甲級商廈市場一個重大突破。
點解上海甲級商廈市場咁好景，翁琳分析指係第二季度，銀行、保險同證券公司對商廈需求強烈，而高科技公司不斷增加喺上海嘅投資，令市場吸納嘅甲級商廈達30多萬方呎，咁租金就由第一季嘅0.98美元一米一日急升到第二季嘅1.01美元。
而當年發展時沙塵滾滾，起好後又空置率極高嘅浦東區，𠵱家就脫胎換骨，仲跑贏大市㖭，第二季嘅租金比去年同期升26.64%，而浦西就只得16.38%。