港股噚日曾跌過137點，但一個拗腰，唔單止收復失地，恒指仲大升173點，期指亦高水49點。
萬六大關之上嘅支持力果然經得起考驗，掉頭一抽上去，恒指最高16445，收市16440，兩個都係今次回升市嘅新高，10日線（16066）再升越100日線（16024），好快可衝破埋50日線（16149），後市可向短期量度上升目標16800進發。
噚日升市，係大藍籌做主力，中資股亦有幫手，唔計認股證嘅上升股有410隻，下跌股232隻，相信要大市去到16800的短期目標後，上升層面才會全面擴散，家吓揀定心水嘅二三線股，到時會有斬獲。
近日推介嘅兩隻消息股上海石化（338）同工銀亞洲（349）都作勢欲動，上石化收3.95元，升0.20元，成交更大增到5290多萬股，今次升破3.825元阻力，短線上升目標係4.30元，有消息指上石化的私有化作價好接近5字頭。
利好因素未反映
工銀高收11.90元，升0.20元，睇噚日個勢，旗形整固快完成，升破12元阻力，短期上升目標係12.80元，中線可見14.50元。工商銀行預計今年第4季上市，要先整合工銀，時間已愈來愈迫切，若有大動作，工銀更有機會上見16至17元。
中化香港（297）走勢又見有突破之兆，收3元，升7.5仙，大圓底收集完成，10日線今日將升破50日線，中期上升大浪即確認，升破前高位3.075元後，第1個上升目標係3.60元。
中化係中國最大的化肥產品分銷商，覆蓋中國20個農業省份，佔71%耕地面積，發展農業係「十一．五」規劃的重點項目，中化具行業龍頭地位，當然亦係最大受惠者。
中化去年大規模注資後，最近斥資1.3億元人民幣，入股魯西化工，而大股東中國化肥集團持有的3項化肥業務，包括青海鹽湖20%、山西天脊40%同山東肥業60%權益，注資的時機亦已成熟，全部完成後，集團的產能將可由現時的300萬噸增至800萬噸，分銷網點亦由1100個增至08年的2000個。
高盛報告指中化利好因素甚多，長線投資價值並未反映，維持「跑贏大市」評級，目標價3.80元。
郭兆誠