初出道的謝安琪（Kay）靠靚聲令人眼前一亮，但其箍牙look更教人印象深刻。脫離鋼牙妹行列，Kay煥然一新，加上新碟銷情理想，在樂壇中漸漸殺出重圍。早前Kay首次參與電影配音，下月更參演音樂劇，還放聲氣恨拍戲，實行做多棲藝人伺機發圍！
謝安琪03年被唱片公司發掘，進軍樂壇。初出道的Kay仍戴着牙箍，雖然天生一把靚聲，不過在講求聲色藝俱全的娛樂圈裏，那排「鋼牙」難免影響見報率。數月前，Kay終於拆除牙箍，面頰瘦了，可愛面容更教人眼前一亮，就連曝光率也好像提升不少。
好成績已是獎品
Kay最新唱片銷量不俗，問她可會特別獎勵自己？她平靜地說：「成績好已經係獎品啦，我唔會刻意計較成績。」出唱片之餘，Kay早前還與緋聞男友張繼聰為電影《加菲貓2》配音，聲演男女主角阿北和麗莎。初嘗配音滋味，她笑說：「淨係靠把聲去表達感情同情緒原來好難，仲要捉口形同節奏感㖭！」
下月Kay又有新任務，就是演出八場音樂劇，她說：「𠵱家每日都由朝排到晚，我未試過要連續兩個鐘唱歌跳舞，真係幾吃力，不過呢啲經驗對我第時唱歌嘅表達方式好有幫助。」當問到會否嘗試演戲時，她即搶着說：「我有興趣呀！我想試多啲唔同嘅嘢，唱歌要多啲唔同經驗先會有質感，所以有機會嘅話我一定試。」
採訪、攝影：藍文浩
化妝：[email protected]
髮型：Jobby@HairPeace
