寫咗呢個blog已經有成個月，今日係最後一次同讀者見面，點都有啲唔捨得嘅。總結今次世界盃賽事，對我嚟講，可謂悲多於喜囉。點解？好簡單啫，5屆冠軍巴西同埋有唔少fans捧場嘅英格蘭喺8強止步，傷透咗萬千球迷嘅心（包括我在內），不過累到我輸錢先至係主因。
而且整體入球率偏低，對於我哋呢班想睇世紀金球嘅球迷嚟講，着實教人失望，亦減低咗賽事嘅可觀性㖭。
不過，我哋都睇到有唔少新星湧現，好似有法國新施丹之稱嘅列貝利、德國嘅普多斯基等等，都總算令人有啲安慰。即係話，下屆喺南非舉行嘅世界盃，我哋啲球迷就有眼福啦，可以欣賞到佢哋成熟嘅球技和秀麗嘅腳法（如果佢哋有入選同埋狀態fit嘅話）。
老套啲講句，「天下無不散之筵席」，希望可以喺下屆世盃再同大家見面啦，拜拜！
彭浩翔
電影導演