好一隻「二五狗」
之前有睇過呢個blog嘅讀者，相信都會記得有一隻戴住黑超嘅洛威拿，着住成身德國嘅打氣戰衣，喺德國贏波時出嚟遊街，同佢影相更永冇望鏡頭。
最近一個夜晚，小記喺街頭又再遇見佢，點知佢已經變成意大利look，身披紅白綠3色國旗。今次雖然冇戴眼鏡，但仍然唔望鏡頭。德國出局後即捧入決賽的意大利，好一隻「二五狗」。
李勇明
曾採訪世界盃、歐洲國家盃、奧運、亞運等大賽，身經百戰。
交通燈人夠趣緻
在柏林，對紅綠燈上那兩個公仔好感興趣；紅燈像一個簡單不過的「十字」，綠燈則是一個戴帽的人行路時的側影，好可愛。他們叫Ampelmann，意即「交通燈人」，是東德交通警的標誌；東西德統一後，Ampelmann深受西德人喜愛，柏林部份交通燈都換了Ampelmann，更受歡迎到出紀念T恤及精品呢。
徐嘉華
採訪過無數大賽，最鍾意捐窿捐罅搵題材，今次德國之行啱晒我。
看台接波要交還
以前睇電視直播波，見到有球員將足球踢咗上觀眾席，都覺得接到個波嗰位觀眾好彩，可以將呢個足球據為己有。唔知係唔係只係呢屆世界盃先至係咁呢，我所見嘅係當個波飛咗去觀眾席，場內保安第一時間走過去問觀眾攞番個波，觀眾唔肯畀番，保安員就硬搶！使唔使咁孤寒呀？有贊助喎，少咁個足球真係咁大件事？
朱冠恆
肩負現場直擊畀料重任，無論你當我名家抑或明燈，都希望交到功課。
