周三法國4強對葡萄牙，前鋒沙夏在最後5分鐘後備入替亨利，但勢估唔到短短5分鐘，便足以令沙夏蒙上人生一大陰影，該前鋒上陣兩分鐘即領得1面黃牌，結果累積兩黃須在決賽服停賽令，因而另一前鋒查斯古特有望後備上陣，難怪其妻比翠絲開心到俾攝記影到見牙唔見眼啦！畢傑
作為球員，參加世盃是他們的終極目標，更何況有份在決賽中上陣？這確實是人生千載難逢的好機會。不過，沙夏卻表現得相當愚蠢，在4強對葡萄牙尾段時，竟鹵莽撞向葡萄牙中場費高，其後被罰黃牌，令到決賽對意大利時肯定要停賽，果真是「5分鐘、冇陰功」！
球證執法算寬鬆
沙夏今次都算黑仔，今場墨西哥球證拉朗達執法水準已經偏鬆，全場僅發出兩面黃牌，但沙夏偏偏榜上有名，只怪他為博表現太過衝動，後悔都嚟唔切。沙夏決賽未能上陣，對他的「足球成績表」固然有所影響，事關唔係人人都有機會參與世盃決賽；沙夏停賽，相信令「第二後補前鋒」查斯古特掩住半邊嘴笑。
沙夏停賽相信最開心的是查斯古特的妻子比翠絲，她知道自己老公有機會在決賽上陣，當然笑到見牙唔見眼。
最冇同情心的是，法國4強對葡萄牙場波，比翠絲與亨利妻子妮歌同時成為座上客；當沙夏領黃牌時，鏡頭更捕捉到比翠絲即雀躍大叫，與身旁的妮歌一同慶祝。估不到場中的亨利及查斯古特合作無間，就連兩位太座亦與其丈夫一樣相當合拍。
法國望歷史重演
其實，以法國現時用慣的4-5-1陣式而言，前線首選一定要揀快速的亨利；而第1後補前鋒當然要選速度較高的沙夏，才能發揮戰術功效。不過，曾經在00年歐國盃決賽加時射入黃金入球，協助球隊擊敗意大利捧盃的查斯古特，如能於今場後備入替，或能再一次成為意軍剋星。因此，無論是查斯古特本人、其妻比翠絲，又抑或是法國球迷，都希望再次重演歷史。
