國學大師饒宗頤今年尾就90歲，不過佢老當益壯，頭腦仲清晰過好多後生仔女，事緣佢老人家噚日出席「選堂書範系列展」，八方例牌都要問吓饒老支唔支持7.1遊行，點知佢答咗句好玄學好高深嘅答案，話：「我喺精神世界度遊行。」成功化解咗呢啲咁尷尬嘅政治問題。但一講到養生之道，佢就停唔到口，話除咗係唔執着嘅性格，仲有自創嘅瞓低但雙腳蹺埋咁打坐，佢十幾歲就開始每日用半個鐘練，練到𠵱家枴杖都唔使用，所以證明有益身心。
饒老今年尾就90大壽，港大饒宗頤學術館之友（即係饒老嘅fanclub）大搞慶祝大壽活動，11月有「饒宗頤與香港大學」相片展；12月中有學術研討會，邀請全球近200個學者出席，實行群星拱照。響學術館嘅「選堂文庫」就籌備得七七八八，裏面有饒老超過20,000冊嘅書藏，連元代嘅線裝書都有。街外人如果想入去參觀，可以打22415598預約。