民建聯之前話過月中會訪京，不過最終都係泡湯，副主席劉江華估計，可能佢哋要見嘅部門實在太多，人哋未必一次過安排到，又話無得訪京咪轉去第二度囉，例如佢哋18號去廣東訪問三日。吓，都好阿Q啫。
既然無得上京，呢個暑假啲黨員有多啲自己時間喇。好似蔡菜子咁，佢呢個周五就會去馬尼拉唱好香港，推介香港嘅投資移民同優才輸入計劃。之後佢就梗係join黨團嘅廣東訪問團，事關個團主要傾環保，佢點可以唔去？跟住佢又會參加由幾個學者組成嘅北極團，睇吓海洋生態。團友之一有包括揭露添馬艦有二噁英嘅溫石麟，唔知嗰時會唔會睇埋北極底下有冇二噁英呢？
聽到呢度，都覺得蔡菜子無時停，但查實佢之後再會跟環境panel去北海道同芬蘭等地考察。睇怕蔡菜子呢個暑期都可以儲到好多飛行里數咯。