元乜元物呢亭迴轉壽司連鎖店每碟壽司$10有兩件，但魚生薄到半透明，算平唔算抵。有壽司店就賣$8一件8吋長兼肉質勁厚壽司，一件頂得過元乜元物三件，呢啲咪叫抵囉！大廚話：「我擺明蝕住做，誓以$8殺出一條血路……（下刪N億字）」殺唔殺得出血路佢嘅事，有筍嘢，嗱臨仆到去食唔好講咁多。
記者：黃若茵 攝影：陳盛臣
牡丹蝦壽司 每件$20
加埋條蝦鬚先夠8吋，的確有啲取巧，但牡丹蝦確實好大隻。我無認真格過價，不過咁大隻牡丹蝦一般日本料理店起碼賣$40，𠵱家擺低兩個金銀膶有得食，抵。
劍魚腩壽司 每件$15
除三文魚外，劍魚腩亦係港人至Buy魚生之一，街價$20左右才吃到細細嘅一件，呢度賣$15仲要足8吋長，簡直係頂爛市。
吞拿魚壽司 每件$8
吞拿魚脂肪少口感軟滑，肥厚8吋長一大片擺入口，因為襟𡁻，魚肉鮮味可以長時間停留口腔，正！雖然唔係最矜貴嘅Toro魚腩，但如此份量已非常吸引。
三文魚壽司 每件$8
我向來好怕食三文魚刺身，因為覺得好膩，又嫌一般三文魚壽司飯多魚少唔夠喉，呢件8吋長三文魚壽司就開正我嗰瓣，魚肉多飯嘅份量啱啱好，抵過淨食刺身。
大嚿飯不如大嚿魚
$8一件壽司聽落已經覺得抵，再望吓鋪面嘅三文魚、吞拿魚、劍魚腩同牡丹蝦，無吹水喎，足8吋長無花無假，邊個話唔抵我第一個舉腳唔服！大廚馬來新舖開業前先做格價專員：「我擺到明要做到抵食夾大件，所以每日午市同晚市都好多客幫襯，舖頭雖然只開咗一個月，但都Keep到唔少熟客喇。」除銅鑼灣160幾間日式餐廳外，佢連元朗嗰啲以抵食做賣點嘅小店都格勻晒：「我發現坊間都有唔少壽司店用大大件魚生壽司做賣點，魚生大件咗呀，搞到連飯糰都變到大大嚿，客人呢？淨食件魚生，嚿飯就無人問津。我就諗不如飯糰照舊細件，將魚生切成7至8吋長，將成本完全放番喺魚生上面，咁至算真正嘅抵食。」
每賣一件蝕$1
8吋長三文魚放入口，我食得津津有味，但馬來就有苦自己知：「我每賣一件壽司，至少蝕$1。」除壽司外，其他菜式嘅份量都比一般日式料理店大得多，又點解呢？「睇過晒嘞，成個銅鑼灣區嘅日式料理都走中高路線，我堅信平價日本料理絕對可以喺銅鑼灣殺出一條血路。」老實講，咁蝕法，我唔明呢條血路點樣殺得出，不過做消費者一於好少理，最緊要夠平夠抵又好食，係咪咁講先？
其他抵食推介
刺身沙律$35
沙律菜上鋪滿三文魚、劍魚腩、八爪魚、同吞拿魚肉粒，每款均有4至6件，配特製醬汁酸中帶甜，無吹水，我一食上癮。
昭和卷8件$78
以卷物來說，8件$78唔算超抵，不過睇清楚每件卷物嘅用料，就知絕對值回票價。三文魚配海膽或三文魚子、吞拿魚配蟹子牛油果，抵在夠足料，要撐。
雜錦天婦羅$48
起初以為件件都係雜菜，點知除咗冬菇、南瓜等8件雜菜外，竟然仲有3隻天婦羅蝦，真係要學滔滔講句：「嘩，第二度食唔到。」
京味牛仔骨$48
9件牛仔骨唔使$50，你仲想點？份量多之餘，大廚更用秘製汁醃製牛仔骨，食嗰陣有陣陣蜜糖香，入口甜甜哋好正。
炒野菜$28
唔計價錢，一般日本料理店嘅炒野草都好鬼死迷你，呢度呢？隻碟嘅直徑有10吋長，啲炒野菜堆到山咁高，足秤到爆。
個個街坊都話抵
手握壽司鬆軟有餘溫
有人話：「手握同用機器壓出嚟嘅壽司飯有乜分別啫？咪又係飯？」咁講大錯特錯，由機器倒模出嚟嘅飯糰形狀大小雖統一，但被壓得過份結實，飯粒甚至被機器切開不成米狀，入口會缺少咀嚼飯粒嘅口感；手握飯糰則飯粒分明，師傅控制力度恰到好處，令飯糰變得鬆軟，有飯香亦有煙韌口感。仲有呀，手握壽司用嘅係熱辣辣米粒，入口有餘溫Warm好多㗎。
雖然話機器做得比人手快，但國師級嘅壽司師傅可以喺1分鐘內握出20多件飯糰，而一般有經驗嘅師傅都可以握到15件左右，要應付客人嘅需要絕對無問題。
搵食攻略
昭陽日本料理（29888441）
地址：銅鑼灣記利佐治街1號金百利商場5樓3號舖
營業時間：12:00nn-5:30pm，6:30pm-11:30pm
交通：銅鑼灣地鐵站E出口
全店座位：60個，設吧枱，可邊吃邊欣賞師傅握壽司
人均消費：午市$25-$28，下午茶$16-$20，晚市$70-$90
最好賣：壽司及卷物，每日賣過千件