侍仔：4強賽踢完，等到9號先有決賽，各位覺得4強戰如何呢？悶波定係刺激？
招積域：其實呢樣嘢就各花入各眼啦，好似你當然覺得自己女友靚女啦，但我另有睇法咁樣囉。
侍仔：喂！你把口咁衰㗎！無啦啦又講我女友，𠵱家講波呀招積域！
招積域：唔係咩？有人鍾意德國就梗係覺得佢嗰款踢法叫做「有規律」，好似阿叔咁撐咗德國隊大半世。但我就認為呢啲叫做唔識變通喇，足球係講應變㗎，阿根廷嘅史卡朗尼之前就鬧得啱喇，德國對一種信念真係「至死方休」，𠵱家4強出局，唔到佢哋唔化。
菠蘿文：踢波係要有規律㗎，你估真係次次都可以「盲拳打死老師傅」咩？好似你隊塞黑亂咁踢，冇HEART又冇隊形，最後咪又係32隊包尾！千里達就識做呢，拎到1分又博到全場掌聲，呢啲咪叫做高明囉，亦即係教練嘅功力。
歐國盃再接再厲
吹水傑：你哋講到好似武俠小說咁，唔通奇連士文係張無忌，納比係張三豐？
侍仔：都可以咁講嘅，奇連士文咁年輕就集天下大成，佢話自己嘅功力係由球會領隊學番嚟，身邊又有成班人發功幫佢，咪好似張無忌咁樣，細細個就有無數人傳授武功畀佢，又九陽神功又太極，最後做到天下第一。
吹水傑：但奇哥𠵱家未拎到世界盃冠軍喎。
侍仔：張無忌識晒全數武功，但都要時間去摸索㗎，我估奇哥𠵱家仲欠經驗啦；納比呢類唔使講都知係老師傅，每次都比你行早一步，想輸都好難。
吹水傑：德國都仲有希望嘅，希望奇哥留任做教練啦，9月歐國盃外圍賽再努力過。
高洛文