前晚我去咗柏林嘅球迷廣場FanFest去睇德國對意大利嘅直播。德國隊輸咗真係有啲失望，本來我都期望有12碼可以贏到意大利，不過都無法啦！德國隊最難得嘅係佢哋嘅團隊精神。隊中有咁多新人同舊人都融合得到真係唔易，其實德國人嘅團隊精神係好細個嘅時候已經培養到出嚟。
自己喺度讀小學嘅時候，學校畀咗我哋好多團結精神嘅concept，例如去旅行、露營同行山咁；老師叫小朋友做咩都要一齊做，唔可以自己做晒，每個小朋友都有責任。老師只會發施號令，所以好細個我哋都養成咗團結嘅好習慣！
袁彩雲
無綫世界盃直擊主持