噚日用過隻金手指為大家篤出一個投資建議，題為《一注獨贏買恒指熊證6204》，叫大家買熊證6204。咁噚日解釋過因為花旗國聯儲局同埋日本中央銀行會一齊繼續加息、抽水之下，點解我覺得個股市會跌。噚日亦應承大家，今日會講點解叫大家買呢隻恒指熊證，同埋解釋我如何得出啲目標價及年期。以下係噚日嘅建議：
建議買入：恒指熊證6204
目標價：揸到「蘋果日報散戶指數」出現「-17」或揸到到期日
年期：熊證到期日2006年11月29日
原本今日《金手指》第一件事就想開始解釋，不過，噚日孫柏文朝早返到辦公室，一開電腦就見到好多《金手指》fan屎寄入嚟嘅電郵。見到咁多fan屎電郵當然即刻開心咗一陣，因為我實在好鍾意收到佢哋嘅電郵，哈、哈。
不過一開啲電郵嚟睇，心情立即逆轉，因為絕大部份嘅電郵都係「提點」我。「提點」我啲乜？大家都知道，牛熊證係有到期日，而喺今日出街嘅建議裏面，刊登咗錯嘅到期日，噚日刊登嘅到期日係2006年12月28日，而今日刊登嘅到期日2006年11月29日先至係正確。
散戶指數 鎮報之寶
出錯嘅原因係前日研究好多隻牛熊證嘅時候，用咗excel。喺決定應該建議大家買邊一隻牛熊證之後，喺copyandpaste嘅過程中出錯，引致出錯到期日。所以希望大家原諒！我亦重申「一注獨贏買恒指熊證6204」！
回歸正題，我叫大家買熊證嘅原因，就係因為熊證比起普通認沽證唔會因時間過去而「蝕水」。講認沽證，就算本身隻股票或指數冇郁，都會因時間過去，慢慢下跌，熊證就唔會有呢個現象。當然，咁着數就一定有代價，熊證有一個叫「莊家通殺價位」。講番熊證6204，如果恒生指數去到17500點，莊家就可以立刻收回所有熊證。大家可能覺得咁樣非常牙煙，不過我深深相信我哋特區股市今年已經見咗頂。今年最高見過17300點，如果我推斷冇錯，恒生指數係去唔到17500點個「莊家通殺價位」。
而點解叫大家「揸到『蘋果日報散戶指數』出現『-17』或揸到到期日」？原因係每個禮拜一見報嘅「蘋果日報散戶指數」係我哋《蘋果日報》好多個數據、調查中嘅「鎮報之寶」。散戶指數出現負數嘅時候，就等如散戶睇市跌多過睇升，由1997年開始，每一次散戶指數出現「-17」嘅時候，亦等如散戶信心崩潰，不過亦表示股市已經中期見底。所以散戶指數出現「-17」係一個好好嘅賣熊證時機。啱啱經過嘅禮拜一，散戶指數就係「15」，大家執生啦！
孫柏文