電腦男終於舒一口氣！事關終於打爆咗惡鬥多月嘅《FFXII》，165小時作戰時間破盡自己紀錄。點解要玩咁耐？咪就係嗰45個討伐任務同一堆靠運不斷「刷」嘅最強裝備，仲有極變態嘅超魔神龍囉，邊有LV93打隻Boss，仲要成3個幾鐘㗎，四方廠擺明整蠱啦！
封印完《FFXII》，本來打算開《大神》波，不過呢個禮拜街機實在太多大作登場，好似高達迷必玩嘅《GundamSeedDestiny》，任你班機迷點鬧，出續篇一樣大把人撐，個個髗堆散銀霸住玩，咁受歡迎，邊間機舖夠膽唔入貨？
另一款人氣大作梗係《Winning》啦，本身名氣響又食正世盃熱，想唔旺場都幾難！最搞鬼係個特別機座可以插PS2手掣，好多玩「神經反射」嘅機迷終於免受4粒掣之苦，一展所長！不過有讀者睇完噚日《蘋果》報道後，有啲唔明想知舊有PS手掣玩唔玩到？查實所有對應PS2嘅手掣（包括舊有PS手掣、非原廠手掣等），街機《Winning》都對應到，不過舊手掣就有啲分唇冇咗，好似每個按掣嘅256級壓力感應、L3、R3兩個Analog掣等，都係唔用好過用，同收銀借個PS2手掣冇咁嬲。
題外話，電腦男同相熟機舖老闆傾開，先知《Winning》個機座「收埋」部PS2，唔怪得要用專用機殼啦，又俾㗎仔屈一筆！
記者：徐影龍