正所謂「民以食為天」，飲食業嘅利錢，不嬲都好吸引，之不過唔熟唔做，尤其喺內地，否則容易蝕入肉，歐洲投資基金3i，相信都深明呢個道理，所以佢哋專搵啲有番咁上下成績嘅品牌商，畀錢入股合作，近排又成功搵到新目標，邊個？咪就喺內蒙古包頭市做火鍋起家，有700間分店嘅「小肥羊」囉！
據華華所知，3i畀咗2500萬美金，買起「小肥羊」部份股本，筆錢係畀間店用嚟加快擴展大陸及國際市場，咁愈多分店客路愈廣，貨量需求多咗，來貨價折扣都易傾好多啦！
講番3i，來頭都唔小，事關佢哋喺歐亞有300個投資項目，涉及多達18億歐元（約180億港幣），喺中國投資嘅項目就有中芯國際、海灣消防網絡、巴黎春天百貨（中國）及分眾傳媒等，家吓就多隻「小肥羊」㖭。