我判官記得之前就今屆世界盃球證嘅執法水準有啲意見，好似葡萄牙對荷蘭嘅16強賽事，一共出咗16張黃牌，雙方共有4個球員被趕出場。唔知國際足協係咪有睇到判官報告，球證執法尺度竟然愈來愈寬鬆！甚至有啲離譜！
意大利對德國嗰場4強戰，雙方其實都踢得落力，當中亦有粗野嘅攔截，但球證好多時唔係吹得益，就係視若無睹繼續比賽。
好似簡拿華路喺禁區內推跌咗普多斯基，球證係有吹罰，但就判咗個禁區外嘅罰球！重有派路係禁區內犯手球逃之夭夭，呢兩個波吹得就會係12碼！
球證執法太鬆，係令到場波進程流暢，但係就使雙方球員得唔到公平對待，有嚴重犯規就判得益，應罰12碼就判禁區外罰球。呢類執法水平真係唔止寬鬆，直頭離譜。
我判官今屆經常發炮轟球證，唔係我得閒無嘢做，而係因為國際足協嘅問題。如果佢一早可以統一咗個執法指引，又或者向球證畀清楚嘅指示，咁往後問題就唔會出現，可謂「捉蟲」！
專家話：禁區白界線起跳難定奪
「佢哋兩個原本喺禁區白界線度起跳，所以其實係喺白界線出面跳入去禁區；加上攝影機角度問題，才有簡拿華路禁區內侵犯普多斯基的爭議，未必應該判12碼。」
陳譚新（國際足協裁判導師）
網民反應：佢個腦係咪有問題？
球迷係咪覺得球證執法過鬆呢？「簡拿華路嗰球又判得無聊咗啲，禁區內犯規但判禁區外罰球，佢個腦係咪有問題？」「保路斯基從後飛鏟托迪都冇紅牌啦，派路冇畀手球好正常。」
世盃判官歡迎球迷來稿
世盃判官係1個在世界盃期間專為廣大球迷而設嘅欄目，球迷如對賽事有任何投訴、意見，想同我哋分享，就快啲投稿！來稿勿過300字。
世盃判官體育版電郵：[email protected]
體育版傳真熱線：23703534