昨日股市走勢都幾反高潮，人人唱好的中國銀行（3988）竟然倒跌3.4％，以3.55元收場，反而大家唔落飛認購，入幾多中幾多的世茂房地產（813），首日表現唔錯，最高見7元，收報6.60元，比起招股價6.25元，高出5.6％。
至於經紀陳提及的恒發世紀（578），勁升60％，收0.44元，但成交唔算大，約915萬元。經紀陳再次提醒小初，話呢類股仔升得急時，同樣有機會跌得急，總之唔好太貪心。
另外，經紀黃昨日推介搞展覽的筆克遠東（752），話隻股由高位回落唔少，最近獲多間證券行出報告推介話抵買，可以趁低吸納咁講。
筆克喺5月份，曾經以每股2.025元配股集資，但其後市況唔就，股價一直回落。上月底筆克公布中期業績，盈利雖然上升10％，有5737萬元，但就比起分析員預期為低。
經紀黃話，家陣筆克股價已經回落至1.56元，若然公司業務持續增長，照計博得過。
慕容小初