七月三日收到《蘋果日報》轉來一份「不平人」讀者嘅來信，信件日期係四月二十三日。「不平人」嘅女兒與外甥女、世姪、世姪女等人都在核數界工作，「不平人」見到下一輩日日做到深夜，拖着疲累身軀返屋企，感到好心痛，故此認為左丁山喺四月份專欄述及年輕會計人員之苦況，好反映現實，反而李八方版之一個True&FairView專欄之「密搵利」話左丁山所收到的料係個別例子，顯與事實不符。
「不平人」唔明白香港嘅四大，點解要後輩做到身心俱疲。佢話：「反觀英國啲KPMG（畢馬威）學師仔每天最遲都在六點半前下班，一星期工作五天。出差時，不特有超時補薪，還付豐厚的餐飲津貼，更舉辦培訓班，指導學師仔考專業試。難道這有損倫敦作為金融中心的競爭力嗎？」
「不平人」之言，令左丁山想起矽谷老友安森，佢位公子曾在倫敦Ａ記工作，又曾在華盛頓Ａ記返工。Ａ記因安隆事件執咗之後，安森位公子重回學校讀MBA，畢業後轉行做玩具公司Buyer，都唔知做得幾開心。呢位世姪話喺華府時往往做到凌晨兩點返屋企，朝早七點抹吓塊面就返工，日日如是，工作時間之長，比香港有過之而無不及。但喺倫敦就唔同，每晚最多做到七點，星期五放工之後，老細永唔會交來一份任務，跟住吩咐：「星期一朝早交貨！」安森公子回憶倫敦，印象甚佳，但又唔覺得倫敦工作效率低過紐約、華盛頓喎！顯而易見，香港四大緊跟美國方式，唔知係唔係會計師樓人手少，接到嘅柯打就多到做唔晒呢？
酒店YY亦有同感，佢喺倫敦返工之時，早返半小時，遲走半小時，俾上司話：「請你準時返工放工。」佢嘅朋友在香港酒店返工，就往往被老細警告：「唔該你早啲返嚟準備，放工未必咁快就走得㗎。」唔怪得好多年輕人視倫敦為天堂，只可惜倫敦啲屋租貴到無倫，「長安不易居」也。