近期有兩單嘢關係到好多好多錢。第一單當然係世界盃，波盤講緊幾千億，英格蘭、巴西出局，好多人輸到喊、莊家贏到笑。我哋香港地最開心梗係馬會。我老友好鍾意法國隊但係冇買法國贏，我話如果佢買咗咁咪好發？佢話：「我只不過係鍾意咋，我唔賭㗎。」
另一單同樣同幾千億有關嘅就係「股神」畢菲特捐咗一大筆錢畀微軟Bill同佢老婆嘅慈善基金。之前微軟Bill已經話要退位而且捐咗好多錢出嚟。呢個基金嘅錢對打工仔嚟講當然係天文數字，對有錢佬嚟講亦係大手筆。
同樣係幾千億，但係捐錢點都好過賭錢。
其實「股神」當阿Bill哥係契仔，阿Bill有今日「股神」都幫過吓手。佢哋肯咁捐錢實在好有道德感染力，所以英國嘅AndrewLloydWebber都響應捐咗畢加索嘅畫出嚟做善事，當然最好就係多啲人響應。
人哋話唔好俾錢控制你，你要控制錢，咁「股神」同阿Bill哥就係錢嘅主人而唔係奴隸。得意嘅係「股神」三個仔女都係咁捐。《Fortune》雜誌訪問佢，佢話只不過係givingmoneybacktosociety，即係將啲錢還番畀（唔係捐畀）社會。
呢份雜誌喺1986年訪問佢嗰陣，佢已經話留畀仔女嘅錢應該係「足夠做任何嘢」（enoughtodoanything）而唔係「足夠而乜都唔做」（enoughtodonothing）。
香港地有好多有錢佬肯捐錢做善事，但係咁捐法就真係好少見。內地呢？有冇咁嘅例子？內地曾經將「向前看」變成「向錢看」，咁點解唔可以將「向錢看」變番做「向前看」？
「股神」話將幾千億「畀番」社會，真係共產過共產黨。中國人教仔以後應該咁同佢講：「仔呀仔，乜嘢叫成功？乜嘢叫快樂？學『股神』，可以將幾千億還番畀社會嘅你好嘢。」
用幾千億令自己快樂，你有冇咁嘅豪氣？
觀火