機管局行政總裁彭定中做咗5年半，上月中宣布做埋今年底就拜拜，唔再續約，噚日佢趁機管局業績記者會，真情剖白。簡單嚟講，佢認為人要知所進退，適當時候做適當嘅嘢，𠵱家係時候將個位交畀人。佢仲未落實新動向，但肯定唔會過檔去另一個機場做CEO。
彭總已經62歲，基本上到咗退休年齡，但係佢依然精力充沛，身壯力健，冇打算真正退休，佢仲同華華開玩笑話：「你唔係覺得我真係好老，要退休啩？」佢離職後會留喺香港，雖未落實新動向，但就希望可以用另一種形式，喺其他方面幫到手。
咁係咪會幫其他機場做顧問呢又？唔過檔其他機場做CEO啫，做顧問冇壞啩。過去幾年，佢將香港機場搞得有聲有色，由賺幾億變成賺十幾億，連續兩年派十億股息畀政府呢個大股東，成績有目共睹，大把人爭住請佢出謀獻計啦。
用陰謀論拆解
彭總早於01年初加入機管局，坊間傳聞，佢做咗3年後，第一次考慮續約嘅時候，都有些少猶豫，最後決定做多3年。佢自己覺得「做一任太短，做三任又太長」，所以決定做埋今年就算。而且，佢喺呢6年裏面，想做、要做嘅，都超額完成晒。
華華就繼續陰謀論，認為彭總唔做，同「董去曾來」有關，彭總始終係董治時代請落嘅人，佢舊年𢭃成691萬人工，加薪2.4%，咁大個肥缺，特首曾蔭權梗係要留畀自己人，為自己增加連任籌碼啦，彭總都係知所進退啫。
李華華