世界盃不經不覺已經進入尾聲，唔知今屆大家眼光如何？荷包有冇進賬？不過我好肯定嘅係，成班忠實球迷一定「獲益良多」。點解？多得世界盃帶挈，每個球迷都多咗對比國寶熊貓佳佳仲要黑嘅黑眼圈、啤酒肚同埋一身豬腩肉囉該煨。
食得是福何必計住
你知啦，世盃完咗之後，我哋又要「重新做人」，過番日出而作，日入而息嘅刻板生活喇嘛，再冇俾自己任性放縱嘅藉口。睇住自己一身肥膏，唯一可以做嘅只有向天長歎。做多啲帶氧運動，參加一系列地獄式減肥計劃，聽落去好似仲未絕望。不過我哋呢班麻甩佬，人到中年，新陳代謝梗係慢啲，況且食嘢又要計住計住，唔好超過幾多卡路里喎，咁樣減法，仲慘過去死。
學老人家話齋，食得是福，肥人有福氣，所以我決定咗以豁達樂觀態度面對，一於少理，當咩都冇發生過囉，係咪好醒呢？
彭浩翔
電影導演