投資推廣署噚日宴請傳媒，介紹該署喺廣東省工作情況；會上盧維思署長提到佢個仔，原本喺英國牛津大學讀會計，畢業後獲當地Big4（四大會計師行）嘅畢馬威聘任，不過做咗冇幾耐，個仔就隻身飛到北京讀咗兩年中文，最後仲決定留喺大陸做嘢，可見大陸投資環境嘅吸引力。
雖然係咁話，但都要睇吓數據。喺噚日廣東省投資研討會上，外經貿廳副廳長朱澤南話，今年頭5個月有21家廣東企業喺香港增加投資，涉及1.67億美元。而駐港中聯辦經濟部副部長王暉就話，至今年5月累計有9809家國內企業到境外投資，嚟香港嘅佔26.6%，相當於2610家；境外投資涉及金額237.76億美元，香港佔29.8%，相當於71.01億美元，反映內地同特區嘅經貿聯繫打風都幾難打得甩。