知識產權署署長謝肅方雖然係英國人，不過就非常熱愛中國文化，仲講得一口流利嘅廣東話。佢好鍾意中國古代民間嘅騎射活動，仲研究咗十幾年。呢幾日佢就同咗囝囝謝凌熙，以及其他騎射愛好者去咗青海參加國際騎射比賽，結果得到一金、兩銀同一銅嘅佳績。
八方問謝肅方堂堂一個城市人，點同土生土長嘅藏民鬥？佢就話致勝秘訣係早幾日去培訓馬匹，順便增進同囝囝嘅感情。凌熙就用英文同八方講，佢喺香港每星期都練騎射，爸爸連續兩年比賽獲獎牌真係好叻。
今次比賽佢哋有前布政司鍾逸傑畀咗一萬蚊贊助，謝肅方話，雖然學騎射非常昂貴，但為咗弘揚中國文化都無計。佢哋比賽嘅日子啱啱撞正青藏鐵路通車，謝肅方話，見到架雙層火車好新好靚，不過畀佢揀，佢就寧願騎馬咁話。