任賢齊為讓寶貝女好食好住，早前斥資買旅行車接載囡囡，令荷包大出血。為幫補奶粉錢，小齊近日到台灣墾丁拍攝眼鏡廣告，扮演風帆手的他更在攝氏35度高溫下暴曬三日，難怪會大歎搵食艱難。
任賢齊正正是老竇唔易做的標準人辦，早前才在台灣為囡囡Rati舉行1歲生日會，為方便帶女兒外遊，更購入保時捷旅行車。這邊廂的小齊為愛女大開水喉，那邊廂他已接拍寶島眼鏡的廣告，賺外快幫補奶粉錢。
眼鏡遮醜
日前小齊到墾丁拍廣告，墾丁是台灣著名度假勝地，但在攝氏35度高溫下，扮演風帆手的他要穿着背心於沙灘曬足三日拍廣告，除大汗淋漓，還曬出背心印，小齊說：「錢真係唔易賺，呢啲都係我嘅辛苦錢。」
今次廣告商拉隊到墾丁取景，原來是小齊的主意，因為他一向喜歡滑浪，但早前卻不停穿梭內地做唱片宣傳，令他已有幾個月沒嘗過滑浪滋味。小齊又稱他對墾丁有情意結，他年少時曾於當地打工，每次到墾丁，還會抽空探望舊朋友。
小齊雖拍攝眼鏡廣告，但其視力十分正常，然而他也賣花讚花香說：「唔一定要有近視、散光至戴眼鏡，眼鏡都係一種fashion，係襯衫嘅最佳配搭，最重要係可以遮醜嘛，我哋成日捱夜，唔夠瞓，所以眼鏡係我嘅必需品。」
撰文：蔡丹
