韓君婷昨日為遮掩其「火柴」身形，大熱天時包到實到港台接受訪問，首度講述其暴瘦因由，並承認醫生證實她有厭食症的傾向及症狀。由於血糖偏低，韓君婷接受訪問時要不停食糖補充糖份，雖然她強調自己個性樂觀，但她在港台碰到梁思浩時竟然感觸落淚，又笑又喊，情況令人擔憂。
現年29歲的韓君婷當年憑着驕人身材及巨躉身形而被封為「籮霸」，不過其圓潤身材已經不復見，取而代之是變成瘦骨嶙峋的「火柴人」。近月來有不少對韓君婷暴瘦的揣測，除減肥過度外，也她因女友陳早茵提出分手而情緒失控，更甚是指她患上抑鬱症以致脫髮及停經。近日深居簡出的她，昨日到港台接受《開心日報》訪問時首度承認現時有厭食症的傾向。
心理壓力
「食咗會有罪惡感」
韓君婷昨日遲了約15分鐘才到達港台，雖然昨日氣溫攝氏32度，但瘦到雙頰凹陷頸筋暴現的韓君婷依然穿上長褸、頸巾和長靴，更用大墨鏡遮掩倦容，無論是拍照及接受訪問時，她都不停啜食手中的珍寶珠，她解釋因為血糖低而要食糖，至於戴墨鏡就因為化妝品令到眼睛發炎。
韓君婷在節目上勇敢大談暴瘦的因由，她說：「之前好多人話我hip（臀部）橫，有試過食減肥丸、去水丸，甚至係影響中樞神經嘅丸，後尾自己keep得OK，但啲報道話我仍須努力，日日聽得多就變咗有日會影響你嘅心情，突然覺得自己好mind，所以就唔食嘢、唔敢食嘢，食咗都會嘔，覺得有罪惡感。我喺一個月前搵人幫（指睇醫生），因為有日我喺浴室見到自己好驚，醫生覺得我開始有厭食症，我都唔知點解會介意其他人嘅說話而搞到身體好weak。」
5呎7吋高的韓君婷，現時體重僅得103磅，她聽取醫生建議希望慢慢將體重一星期提高一磅，她說：「我𠵱家好易病同發燒，都試過頭暈，好似今日就有少少傷風，我一日會食三餐，但食得唔多，加埋只係得一個飯盒嘅份量，仲要食啲易消化嘅嘢，同埋食維他命丸，好似我今朝都有食咗麥片同奶做早餐，𠵱家食嘢會好開心，因為係對身體好。」
滿意身形
「有人瘦過我好多」
之前有不少對她身體狀況的揣測，韓君婷說：「有話過我感情同埋減肥藥嘅唔好揣測，其實係我嘅問題，係我儍，突然介意講咗一樣好耐嘅嘢，總之𠵱家做番自己就開心。」
雖然韓君婷強調自己個性樂觀，但昨日她在港台遇見梁思浩時竟然一度感觸落淚，令人大感訝異。韓君婷坦言身邊的好朋友都十分擔心她的情況，反而父母從來沒有強迫她進食，就連纖體公司也要求她增肥後才再做宣傳，不過她似乎不覺自己過瘦，她說：「係瘦咗啲，但唔係好過份，醫生有畀我睇啲相，有啲人瘦過我好多，自己就唔想變成咁。」
採訪、攝影：駱華齡
