喺我判官心目中，一直得捷克嘅尼維特配得上「鐵人」稱號，但𠵱家肯定多咗瑞典嘅34歲老將軒歷拿臣！呢個老將原來唔使唞㗎，瑞典世盃出局冇耐，佢竟然同新球會希爾星堡講，想喺呢個禮拜就落場比賽，呢啲唔叫「鐵人」叫咩？
軒歷拿臣上季喺巴塞踢咗成季聯賽，再踢埋今屆個世盃，好多人都覺得嚟緊將返老家效力希爾星堡嘅佢，會放假唞唞回吓氣咁，話晒佢都唔係後生仔。點知拿臣唔好好珍惜休息嘅機會，仲同新老細講話隨時可以上場，佢咁鬼鍾意踢波嘅？
聽講希爾星堡嚟緊星期四會喺瑞典盃對宿敵哈馬比，𠵱家仲急住幫軒歷拿臣搞緊球員註冊名單嘅嘢，如果趕得切啲批文，軒歷拿臣周四就會幫希爾星堡上場搏殺。
好多球星為咗打世盃成季都要比賽，我判官成日都聽到佢哋都會呻話冇得唞；但係拿臣成34歲人，唔係十幾歲嘅𡃁仔，佢嗰份對足球嘅專業態度，真係值得各大球迷嘅尊重，起碼好過嗰啲為咗夜蒲而成日唔練波嘅球員吖！軒歷拿臣，抵讚呀！
判官話
相信軒歷拿臣唔使唞嘅原因，唔係為咗討好新老細希爾星堡，而真係出自對足球嘅一份熱誠。
鐵人指數：★★★★★
註：以5★為最高
專家話：可能急於帶領新球員
「拿臣急於替希爾星堡上陣有兩個原因，首先他去季於巴塞長居後備，體能消耗不大，瑞典出局後距瑞典盃開賽有兩周休息；他可能急於帶領新球員才要求上陣。」丘建威（有線足球評述員）
網民反應：想討好新老細
球迷又點睇軒歷拿臣唔使休息嘅「鐵人」做法呢？「佢梗係想討好新老細啦，咁博！」「我得16歲咋，踢完波第朝我實唔返學！」「佢真係好熱愛足球！」
世盃判官歡迎球迷來稿
世盃判官係1個在世界盃期間專為廣大球迷而設嘅欄目，球迷如對賽事有任何投訴、意見，想同我哋分享，就快啲投稿！來稿勿過300字。
世盃判官體育版電郵：[email protected]
體育版傳真熱線：23703534