加度素好腳法喎！
平時覺得意大利中場加度素得個勤力，腳法就好一般，點知星期一睇完意大利操練，對呢位AC米蘭工兵完全改觀。印象中佢打波好投入，攔截有時幾過火，係將勤補拙嗰類球員。如果大家都係咁諗，咁就大錯特錯。因為最近睇完佢操練，加度素嘅踢法可以好瀟灑，扭波能力都唔錯，只係場上冇表現出嚟，主要係做番教練畀佢嘅工作搶波同交波。
李勇明
曾採訪世界盃、歐洲國家盃、奧運、亞運等大賽，身經百戰。
環法賽下周抬頭
為了環保，不少德國人愛騎單車。而一年一度的環法單車賽亦是德國人的至愛，可惜德國車壇國寶烏列治最近受禁藥事件纏身。近日部份百貨公司也開始用大電視直播環法賽，還有販賣環法單車衫，包括各色戰衣，但其他紀念品則少得很，只看到膠水壺，但要40歐元，有環法標誌都係咁話，太貴了；不過環法聲勢暫被世界盃掩住，下周應可抬頭了。
徐嘉華
採訪過無數大賽，最鍾意捐窿捐罅搵題材，今次德國之行啱晒我。
德國興露天玩水
香港泳池有蟲，德國冇呢個問題，因為根本冇咁多公眾泳池。德國人夏天消暑方法之一，就係一家大細去到露天廣場嘅噴水池，浸吓腳玩吓水咁。呢日漢諾威市面又錄得超過攝氏30度以上高溫，自然又見到唔少德國人「洗腳」；我都掂過吓啲水，估唔到啲水都幾涼快，但就唔敢洗面囉，點知係咪流番入去噴水池入面嘅「洗腳水」？
朱冠恆
肩負現場直擊畀料重任，無論你當我名家抑或明燈，都希望交到功課。
