聽講下屆世界盃，免費電視台可以直播22場賽事，如果真係成事嘅話，對所有球迷來講，真係天大喜訊。不過4年之後，即使電視台有得免費播多場球賽，但好可能就冇咗把熟悉嘅聲音做評述喇。
我細細個就聽阿叔林尚義把聲大，非常有親切感，而且佢講波又風趣，唔係個個都可以學到。阿叔自己話講埋今屆就退休封咪，對香港球迷來講，簡直係一個大損失。雖然𠵱家有新一輩嘅評述員講波，唔係話佢哋唔好，只不過聽落去點都有啲唔慣。所謂長江後浪推前浪，我都希望新一輩嘅評述員可以有自己嘅風格。
雖然阿叔冇幾耐就要退休，不過佢對球壇有咁大貢獻，我認為出版社應該要幫阿叔出番本自傳，將佢踢波同講波經歷記錄下來，相信大把fans捧場，唔愁銷量啦。
彭浩翔
電影導演