港人崇日，通街都係醜版Lolita、翻版步姐，日本時裝、日本菜、日本仔、日本妹……照辦煮碗抄到足，當真抄足？咪自欺欺人喇！903《空中喱民》節目DJ阿喱同Leo（詹志民）搞緊個「日本妹大賽」，參賽者要裏裏外外都變成一個日本人：「今日帶大家去我哋至愛嘅日本餐廳，希望指正到香港人對日本飲食文化嘅長期謬誤。」好，一切由食開始，學嘢時間到！
記者︰方綺君 攝影︰陳陶鈞
學嘢時間到！
香港人對日本飲食文化存在唔少錯誤觀念，𠵱家Leo同阿喱就親自示範兼指正，係時候學嘢嘞，仲唔攞紙筆抄低？
五木麥麵$40
即蕎麥麵，師傅煮冷麵功夫到家，麵條煮軟後立刻放入超凍冰水過冷河，時間拿揑得準，所以爽口唔黐牙。記得大大聲逐條麵條索入口喎，你食到嗦嗦聲，即係代表讚緊師傅手勢好，明無？
煙豬肝$68 池魚刺身$150/100g
豬肝喺日本宮崎縣預先煙好，來港切成薄片即可食用，味道似芝士一啲都唔腥。池魚日日入貨，即叫即切，保證新鮮。
雜錦天婦羅$55
一籃有齊南瓜、茄子、魚塊等等食材，講真係一道好簡單嘅日本菜式，最考功夫係外層的脆漿，要夠薄身之餘又有香脆口感，咬落先唔會成口粉。
海膽刺身時價約$200/50g
店方選北海道入口嘅日本馬糞海膽，貪馬糞海膽當造合時，望落顏色靚絕，一啖入口即溶，鮮味喺口腔及喉嚨內四處游走，好味到唔停得口。
串燒牛脷$40
日本牛脷經燒烤後肉香四溢，加上灑上面嘅胡椒、鹽同香草，惹味程度滿分，不過口感偏硬，扣番少少分。
醬燒茄子$50
大大隻茄仔燒烤後，入口仍然有好多汁，夠鮮味！要讚嘅係伴燒的自製日本麵豉醬，Leo同阿喱最Buy。
燒活鰻$85
新鮮日本活鰻生劏立即燒，搽面嘅鰻魚汁由師傅精心調製，肉質肥美魚油滿口，阿喱話︰「口感好似海膽呀。」
Leo阿喱愛㗎妹
903DJ阿喱同Leo，就好似大部份港仔一樣，對日本美少女情有獨鍾，先前喺電台節目已經舉辦過「劉華王」選舉，選扮得最似華仔嘅聽眾做冠軍。今次投自己所好，搞番個「日本妹大賽」，咪心邪，唔係扮AV女優，係扮可愛清純美少女，港女要倒模一樣，由裏裏外外變成一個日本妹。Leo話：「港人崇日，但係又學唔得晒，今次我哋會揀合適聽眾，將佢大變身。」嘩，咁使唔使學埋茶道玩埋花道㗎？「詳情請大家留意我哋嘅節目《空中喱民》。」唓，懶神秘，唔畀機會你繼續賣廣告，我轉話題︰「你哋至鍾意邊類型日本妹？」Leo搶答︰「初出道嘅廣末涼子！嗰種清純到𠵱家都無㗎星可以代替。」哦，典型水汪汪大眼美女，正路吖！阿喱就咁話︰「椎名林擒！有日本女性韻味，至鍾意佢着旗袍。」有型識着衫，日本妹一地都係，都係大路之選啫。
師傅快手密密切
邊食邊講㗎妹，今次拍攝嘅日本料理店叫「海裕」，係Leo同阿喱嘅誠意推介：「點解推介呢間舖？一來配合到我哋即將舉辦嘅『日本妹大賽』主題，其實個節目……」又想賣廣告？我即時踩停佢哋Hardselll：「二來呢？」「……二來，我哋同老闆好鬼死熟，試過搵佢去商台粉墨登場，開咪做試食。講真我哋好欣賞呢度嘅每一道菜式，尤其係刺身，好新鮮，新鮮，就一定好味。」「海裕」已經喺九龍城屹立不倒8年，要企硬喺呢個食店林立嘅美食區，食物少啲新創意新花款都唔可以立足。睇裝修，老實講無乜，不過座位尚算寬敞，至少唔會坐到背脊對背脊咁辛苦，三位師傅又有多年做日本菜同切魚生經驗，大家合作無間，阿喱讚：「師傅做嘢夠快手，繁忙時間人頭湧湧都唔使點等。」呢點我認同，時間寶貴，食嘢要我等？我實等到發𤷪𤺧。
搵食攻略
海裕魚生壽司日式料理專門店（27183988）
地址︰九龍城獅子石道23至25號地下
營業時間︰11:00am-2:00pm
交通︰九龍塘地鐵站乘25M小巴，獅子石道與衙前圍道交界下車
座位︰50個，唔算大，但絕唔會背脊貼背脊
最好賣︰白湯稻庭麵、油甘魚刺身
