建設銀行內地總部喬遷，應該係喜事一單，事關地方大咗，裝修新淨，但係員工唔單止唔開心，仲為咗搬寫字樓，搞到𠵱嘩鬼叫兼破財，點解？原來佢哋覺得，新辦公室5月中先裝修完，6月23就搬入去，裝修時用嘅化學物料，冇咁快散得晒，會影響室內空氣質素，喺入面做嘢，咪即係等同吸毒氣。
據《新京報》講，建行都知員工擔心，所以用咗唔少錢，買咗好多植物放喺公司吸毒氣，又搵專人做空氣調查，結果就梗係一切正常；不過部份員工仲係有懷疑，索性自己夾咗成千蚊，搵人返嚟檢驗，誰不知，份報告同公司個份好唔同，好多嘢都超晒標，家吓都唔知信邊個好。
建行話，家吓已經有500幾人搬咗去新寫字樓，員工如果適應唔到新環境，一係放假，一係調去其他部門，再唔係就暫時留番喺舊寫字樓嗰邊做住先。