一句「你有壓力，我有壓力」，令原本靠綜援為生嘅巴士阿叔，紅遍香江，但估唔到佢嘅名氣喺內地一啲都唔輸蝕。話說內地嘅《新周刊》同埋新浪網，喺網上搞咗個中國壓力測試問卷調查，有超過12,000名網民響應，問到「誰是近期最有壓力的人」時，巴士阿叔都排第六，有超過700人選佢；而近日備受陳四萬挑戰嘅特首曾蔭權，都只係得第四咋！咁排第一嘅又係邊個呢？係央視名嘴黃健翔，有五成人認為佢壓力最大，佢有份講世界盃，因為高喊意大利萬歲、又激嬲澳洲人，結果有排煩。至於排第二同第三就係近排因燒車而惹官非嘅竇唯，同埋大鬧酒店房被指失常嘅新加坡歌手許美靜；至於啱啱王菲為佢添丁嘅李亞鵬，就排第五。