世界盃八強對決，相信英格蘭對葡萄牙一場最多人睇，一位喺酒店做夜班嘅老友話，上星期五、六兩晚，午夜後蘭桂坊一帶，充塞大量人群，好似開嘉年華會睇煙花咁旺，但幾條街都唔見有的士，大概司機都收晒工，睇波去了。左丁山睇緊英葡大戰之際，收到多倫多、東京、倫敦嘅電話，幾位朋友都一齊睇波，特登打電話嚟講吓，可見英葡大戰夠轟動。
左丁山睇英國波好耐，熟悉英隊球員，因此感情上都想英格蘭晉級，但係計算一輪，覺得英格蘭衰在個領隊，而葡隊教練史高拉利日讀夜讀「孫子兵法」，教埋球員讀㖭，甚工於心計；於是下注葡萄牙贏，二穿三過關射落法國贏巴西。落完注，心情好矛盾，因為好想英隊晉級也。英格蘭踢法保守，用朗尼一個前鋒，朗尼左衝右突，始終冇法子過到葡軍嘅double-team（兩人夾擊），尋且發火踩卡維路下陰，被趕出場。朗尼如果唔識踢波，就似足貧民區街頭好勇鬥狠之不良少年，踢到㷫就會失去理智，果然俾史高拉利之兵法算到。
英國人係好難贏波，但英國人性格好頑強，處於劣勢下每每拚命死守，想贏佢哋亦不易。結果十人死守，竟然迫和葡萄牙，葡萄牙要射十二碼先至贏到波，等左丁山條波纜斷咗。好彩馬會嘅法國客勝賠率有五點二倍，於是左丁山仍有微利。點解夠膽買法國贏呢？並不難估。巴西教練彭利拿唔敢得罪大牌球星，朗拿度、阿祖安奴二人平時打波根本行行企企，唔肯走動，朗拿甸奴發動攻勢，一交直線就冇人去追；兩個後衞卡富、卡路士紀有咁上下，踢到入八強，已是強弩之末。反而法國老將施丹因曾停賽一場，反而得到時間休息，佢一個人掂，成隊法國就生晒，對巴西竟然有五點二倍，實在吸引到極。左丁山預料世界盃會由意大利對法國，爭冠軍勝負難料，輸贏講臨場運氣，睇吓邊隊好啲。