06年過咗一半，各大證券行金融機構紛紛出嚟，講吓半年結。法興證券周一率先跳出嚟，同大家分析咗窩輪市況，噚日輪到花旗集團同BNP百富勤講環球市場新形勢。
花旗銀行環球個人銀行服務投資策略及研究部主管潘國光，對下半年港股較樂觀，估有機會重上17300點。會上有記者問，近日恒指服務公司修訂咗恒指編算機制，對市場有冇影響？佢語帶戲謔咁話，相信除咗恒生旗下嘅基金，同埋盈富基金會關注今次嘅修訂外，基本上唔會對其他基金組合造成任何影響，因為大家主要用MSCI大摩指數做基準，好少用恒指咁話。
花旗呢位仁兄都算大口氣，咁可能係同行相輕。恒生雖然冇花旗咁大，但話晒人哋恒生都搞咗個指數，仲有成30幾年歷史，但就唔見花旗有類似嘅指數出嚟。
回報鬥一番
睇番花旗年初向投資者建議嘅投資組合，將57%放喺環球股市債券、24%喺混合型債券、7%喺能源及新能源股份、6%喺中國概念股，以及6%喺亞洲股債市場上。
𠵱家年中總結，呢個模擬投資組合嘅年度化回報率為16.29%，較MSCI全球指數嘅18.1%略低。不過，華華根據彭博資訊嘅資料睇，原來恒指嘅年度化回報有成20.6%，仲勁過MSCI全球指數。
李華華
讀者如有任何意見或報料，歡迎發送電郵至[email protected]。