世界盃終於打入4強爭霸，作為忠實球迷嘅阿明同阿驛，早前睇初賽時已經晚晚蒲吧通頂，雖然已搞到痰多氣咳兼爆瘡，但咁重要嘅時刻，佢哋當然要繼續撐落去啦！不過據中醫講，經常捱夜又煙酒過多，容易上火兼傷脾胃，所以阿驛就急急向李醫師請教，煮番幾道下火菜，急急降火睇世盃。
記者：曾靜茵
攝影：陳陶鈞
示範：曾太、阿驛、阿明
食譜提供：本草安和堂（29794168）
地址：天后銅鑼灣道180號百樂商業中心402室
苦瓜炒肉片激退暗瘡
價錢：$15/2人
需時：10分鐘
日日捱夜睇波，搞到阿明阿驛兩個都滿面暗瘡，無面見人，阿驛媽咪就教佢用苦瓜炒肉片，因為苦瓜有助清熱解毒，有助減腿暗瘡，不過苦瓜屬寒涼，所以李醫師就建議加入杞子，既有中和作用，又可補腎。
材料
苦瓜半個（切片）、杞子10克、豬肉6両、辣椒2條（切絲）、蒜頭2粒（切碎）、生抽少許、鹽1茶匙
苦瓜$8/斤（a）
杞子$15.1/150克（b）
豬肉$24/斤（a）
簡易法
1.杞子浸水；
2.爆香蒜頭、辣椒，加入豬肉快炒；
3.加入苦瓜、杞子及調味後，放少許水燜煮3分鐘，加以略炒後即成。
貼士：
醃豬肉時，加入1/2茶匙水，豬肉會更滑。
百合炒蘆笋龍脷柳卷潤肺止咳
價錢：$30/2人
需時：15分鐘
阿明成日蒲吧睇波，每次都將成打啤酒隊落肚，雖然佢唔食煙，但吸埋啲二手煙，搞到煙酒過多；阿驛就用有潤肺止咳的鮮百合，再加埋蘆笋龍脷柳一齊炒，最後仲以健脾的淮山粉埋芡，好等唔覺唔覺食埋落肚。
材料
蘆笋8両、鮮百合2両、龍脷柳1條、淮山粉12克、杞子12克、鹽少許、生粉少許
蘆笋$12.9/200克（b）
鮮百合$5.9/包（b）
龍脷柳$24.9/454克（b）
簡易法
1.將蘆笋（6両）先以滾水灼熟；
2.龍脷柳切段，捲入蘆笋，放入油鑊煎至金黃色；
3.將蘆笋（2両），加入百合、杞子略炒，加入少許水，以淮山粉埋芡，放入煎好的龍脷柳，以鹽調味後即成。
貼士：
龍脷柳不可太厚身，百合、杞子要快炒，以免變黑。
冬瓜蓮子葛花燜豬肉健胃益脾
價錢：$18/2人
需時：15分鐘
阿驛就最鍾意邊睇波邊食薯片、花生、蝦條……可以話唔熱氣嘅都唔食，搞到消化不良，無晒胃口，而李醫師就建議以冬瓜葛花去燜豬肉，因為冬瓜有助消滯，而蓮子亦有助健胃益脾，就算食滯都唔怕啦！
材料
冬瓜半斤、豬肉半斤（切片）、葛花12克、蓮子15克、生抽1茶匙、糖少許、鹽少許、生粉少許
冬瓜$4/斤（a）
蓮子$6.5/150克（c）
簡易法
1.冬瓜洗淨、去皮切件；
2.豬肉走油，加入葛花、蓮子、冬瓜及少許水燜煮10分鐘，加調味即成。
貼士：
冬瓜不可切得太細，以免燜煮過後變成茸。
百合什錦蒸明目下火
價錢：$30/4人
需時：22分鐘
呢屆世界盃睇到個個都眼火爆，阿明雙眼亦起晒紅筋，醫師就叫阿驛清清哋蒸個百合什錦蒸，當中有菊花同芫荽，既有明目的作用，又可以下火，咁就可以精精靈靈咁睇4強賽啦！
材料
豬肉半斤、本菇3両、蛋2隻、鮮百合1個、白果6粒、菊花10克、海帶雞湯22/3杯、芫荽、生抽1/2茶匙、鹽1/2湯匙、米酒1/2茶匙、醋、淮山粉適量
蛋$10.9/20隻（c）
白果$5.9/80克（c）
芫荽$3/包（c）
簡易法
1.將蛋打散，加入2杯海帶雞湯，製成蛋液；
2.豬肉以生抽、米酒調味；菊花去莖，以醋輕灼；
3.將豬肉、本菇、白果放入碟中，加入蛋液，隔水蒸15分鐘；
4.將其餘的海帶雞湯倒入調味料中，放入百合、菊花，以淮山粉埋芡，淋上蛋面，撒上芫荽即成。
貼士：
蒸蛋時可以碟蓋好，蒸出來便更滑身。
睇波捱夜湯清熱寧心
價錢：$38/4人
需時：15分鐘（未計煲湯時間）
4年一度嘅世界盃盛事，梗係緊張又刺激，但當球證無啦啦又畀紅牌嘅時候，真係搞到阿明谷到臉紅耳赤，分分鐘爆血管呀！所以阿驛就特意煲咗呢個捱夜湯，當中的茯苓有寧心作用，夏枯草又可清熱解毒，再加埋其他藥材，飲完即刻下火。
材料
蓮子12克、百合12克、淮山15克、麥冬10克、夏枯草8克、菊花8克、茯苓12克、葛花10克、杞子12克、大棗30克、豬𦟌8両、鹽適量
豬𦟌$24/斤（c）
麥冬$2/両（a）
茯苓$10/4両（a）
簡易法
1.豬𦟌洗淨，出水。
2.將所有材料加入3公升清水中，煲1小時，調味後即成。
貼士：
材料要冷開水落，水滾後改中火煲約1小時。
醫師有嘢講
無論做咩事都唔可以過度，李世德醫師話近期因為世界盃，好多人都經常捱夜，容易導致過度疲勞，再加埋煙酒過多，就更容易令肝火上升，除咗影響脾胃吸收之外，又令人變得激動暴躁，所以若想調理好身體，可以適量地進食藥膳菜，有助清熱解毒下火。
（a）美孚街市
（b）美孚百老匯街4期百佳超級廣場
（c）美孚吉利徑惠康超級市場
＊以上價錢以7月4日為準