食住世界盃個勢，《WinningEleven》（WE）喺街機推出2006版。佢唔只係以家用版《WE》9做藍本，仲畀你插埋PS手掣上網同日本《WE》迷打場友誼波。一直受街機掣影響，覺得喺街場發揮唔到真正實力嘅朋友，嗱嗱聲拎屋企個私伙掣出嚟，實行以掣會友顯身手吧﹗
記者︰陸俊雄
攝影︰黃子偉
ImageBoy&Girl︰Jerry、Phoebe（Salvador）
玩卡買人 打聯賽
呢集《WE2006》唔可以忽視張卡，開新卡玩要$30。其實玩家唔用卡玩一樣得，但只可以玩國家隊，唔可以玩球會打聯賽。如果一卡在手，一開始你就有100分去買人。建議大家一定要買，因為開首隊波啲原創人腳法有限，繼後你就利用贏波賺返嚟嘅分，去WEShop再買球員。《WE》迷最鍾意做就係組織自己隊DreamTeam，巴塞、皇馬同車仔都行埋一邊。仲有，呢張卡唔只玩《WE2006》先有用，好快Konami就有幾隻新街機推出，如打鼓、結他、麻雀遊戲等，一卡可儲多個Save。
用PS2手掣信心返晒嚟
無論各位《WE》迷喺屋企打到曉飛都好，十居其九落到街場打，龍都變晒蟲!小記唔係暗示大家係「門口狗」，明白只係手掣累事啫!但大家從今開始可以放心，新出呢隻《WE2006》係可以插PS2手掣玩，你喺屋企所練嘅絕技，係時候喺街場盡Show畀人睇。
唔玩開嘅朋友一定質疑，個掣係咪真係咁重要﹖簡單睇吓街場係咪有齊L/R嘅1同2掣就知答案，用街場掣分分鐘按錯，又唔似PS2掣按R1快放去得咁爽。雖然熟能生巧，不過要畀錢交學費煲熟新掣嘅話，說話就唔係咁講!而且呢次仲可以自備私家掣，或者即場畀$100按金租PS2掣玩，咁貼心嘅服務點能夠唔好好利用。
與日本《WE》迷決戰
除咗有得插PS掣咁搞鬼外，無得同場對戰都係今集特點。咁即是齋同電腦打咁無聊?非也，你只係去到更大更闊嘅《WE》舞台，接上互聯網同日本《WE》迷或香港其他機舖嘅朋友打。
小記喺街場問過唔少機迷，都話以打倒日本《WE》迷為目標。佢地仲透露︰「其實日本仔唔算好勁，好易扭過佢哋，相反遇上香港人更難應付。」筆者自己落場打過，覺得所言非虛，但眼見多數日本《WE》迷好快就買齊一隊星河艦隊，前面亨利、卡卡，後面有加拿斯、尼斯達，好唔抵得啲日本仔咁鬼有錢狂煲機買人。
新加輕觸式設定
喺玩法上，呢集2006其實係PS2嘅《WE9》，登場人物一樣係實名，不過現時只有日本版，未有英文版，所以外國人都係片假名。另一個與家用版最唔同嘅係，開波前部份設定係在輕觸式屏幕上進行，好似開新卡時設密碼、選擇用PS2掣定街機掣等。至於放卡時亦好似喺地鐵用八達通咁，放喺接觸面上感應，卡都唔使插，夠晒新鮮感。
Kickoff後感
唔好睇Phoebe十指纖纖，其實佢喺屋企打開《WE》，佢話︰「估唔到街機可以用私伙掣玩，咁我都要出嚟露一手，唔好畀男仔覺得《WE》係佢哋天下。」至於Jerry就試吓用街機掣玩，感覺辛苦咁話︰「真係好易按錯掣!而且因為上網嘅關係，球員遲一兩秒先收到指令，每場要當自己作客咁打，好有難度，不過我係鍾意挑戰難度嘅人。」
筆者身為《WE》迷，買部PS乜都唔玩淨係打《WE》一隻遊戲，今次點能夠唔落場試吓﹗試完後覺得，球員有時候雖然遲一兩秒先收到指令做反應，不過相比起前作跑步溜冰、滑草咁，感覺真實好多。加上可以同日本《WE》迷切磋，贏咗之後更加有成功感，所以畀10分滿分。
查詢︰高達遊戲機
地址：鰂魚涌英皇道987號地庫