中國銀行（3988）上市時已經十分矚目，內地發行的A股今日掛牌，兩個保薦人高盛同瑞銀昨日夠期出得報告，即刻拿拿臨唱好，分別話睇中行目標價3.90元同埋4.22元，現價仍然買得過咁講。
經紀黃話，中行窩輪開始出籠，加埋其他衍生工具一齊炒作，中行呢輪唔日日創新高先至出奇。中行昨日升1.38％，收3.675元，創上市新高，成交金額高達19.27億元，係排第二位嘅滙控（005）兩倍，真係誇張得交關。
炒貨疏兼有後着
至於股仔方面亦不愁寂寞，停咗一輪牌嘅恒發世紀（578），剛公布以4.44億元收購河南煤礦業務，並於今日復牌。經紀陳話，雖然資源股近期冇早排咁好炒，但恒發世紀貨疏，同埋江湖傳隻股稍後或有抽水活動，唔排除有機會抽高。
經紀陳補充話，呢隻股屬高風險行列，想玩一定要識得執生。
慕容小初