重組後嘅滙豐個人理財業務部，𠵱家由來自亞太區嘅班子上位兼打骰，處事作風同以前嘅「柯大俠」柯清輝、「多姐」薛關燕萍比，當然唔同，華華覺得，佢哋愈嚟愈識得推廣兼搶鏡，作風似乎高調咗。
今年2月滙豐喺香港帶頭減按揭息一役，都係由新任亞太區個人理財存款、按揭及專項業務主管Diana施穎茵揸「𨋢」。勞師動眾開記者會講減息，喺獅子行嚟講都算少見。
最近個人理財業務部又喺中環滙豐總行嘅全海景宴會廳，同「滙豐廚房」合作搞「滙果豐宴」（圖），以一系列自創嘅特色水果中菜（柚子、草莓、奇異果、木瓜同蜜梨等）招待客戶，菜式包括「白玉養笙鮑」，以竹笙、蘋果及鮮奶燉鮑魚；另一道「奇異龍吐珠」則為椒鹽龍蝦配奇異果醬。搞呢個鮮果宴要花數個月時間，每次宴客要準備大約兩粒鐘。
華華噚日有幸作客，佢哋嘅亞太區個人理財服務及銷售主管區佩兒話，已經請過幾次客人，反應都唔錯，花咁多心思，都係想畀個好嘅印象客戶啫！