買大型屋苑，通常都貪佢管理同設施比單幢樓好。但係住大屋苑又想有開揚嘅環境，唔少人會選擇連天台單位，多啲空間。
天水圍嘉湖山莊就係典型嘅密集式屋苑，由於位置遠離市區，樓價較平，百零萬有交易，成為上車客樂園。中原地產經理郭佩玲就話，最近一個區內客就鍾情嘉湖嘅連天台單位，因為天台可以種吓花，又可以同朋友開吓Party燒嘢食，搵樓搵咗兩個幾月，終於拍板用147萬買咗個樂湖居8座頂層連天台嘅H室，每呎2059蚊。
雖然價錢高出市價3%，但係經紀講，由於呢類連天台單位放盤唔多，成個市場大概15個，有啲業主又對後市太樂觀，叫價好進取，每呎叫價2500幾至2700幾蚊，小量業主就擔心銀行稍後會追加利息，所以唔敢叫價太高。
啱啱成交咗個連天台單位，原業主原先開價155萬，爭持一段時間，最終肯減8萬蚊。買家見盤源唔多，難得個業主肯減價，所以寧願高市價少少入市。經紀重話，單位向西南，幾開揚，搞完裝修都應該趕得切今年中秋節上天台賞月。
電郵地址：[email protected]