資深投資者廖太廖湯慧靄，佢投資車位出晒名，佢其實都揸唔少商舖物業，對灣仔摩利臣山道舖位特別鍾情。
中原香港商舖部營業董事游家成話，廖太剛以約1800萬，買入摩利臣山道46號地舖，面積約1000呎，呎價1.8萬。聽講原業主意向價1700萬，但廖太就最終畀到1800萬買番嚟，夠晒進取。
個舖𠵱家由燈飾店以每月6.5萬承租，回報4.3厘。
原業主02年11月用745萬買入，揸咗近4年，賺1055萬，升值1.4倍，果然夠眼光。
點解廖太肯畀高價去買舖，聽市場講，原因可能係佢喺呢度已經揸咗啲貨，再買件等個組合變得更「正」。廖太喺04同05年先後買入摩利臣山道54號地舖，同70至74號地下連1及2樓，54號購入價1300萬，70至74號就用咗7300幾萬買番嚟，連埋新買呢件，動用資金過億。
早前政府計劃將銅鑼灣加路連山道同禮頓道交界地皮，改劃為綜合商業發展用途，仲諗住起行人通道網配合，對附近一帶商舖會有刺激，廖太𠵱家再入定多啲貸，遲吓就可以收成。