亞視每晚11點45分有個叫做「你有理講」嘅時事評論節目。好多人都批評呢個節目左到暈，事關上親去講嘢嘅都係左佬。但係卿姐噚日就同呢個節目平反。佢喺一個論壇上話，自己受過亞視邀請，不過推咗，因為個節目夜嘛嘛至播，有鬼人睇咩，而且一來一回搭的士去錄影就要百幾蚊，真係唔多化算，所以自動放棄。
鬼咁精打細算嘅卿姐仲話，湯大狀就上過嗰個節目喇，都唔明點解佢咁蠢！其實男人一向喺錢銀上冇咁計較，況且湯大狀都唔志在嗰嚿幾水㗎啦。
另外，港台呢期邀請陳太做節目餘波未了，廣管局收到五宗指摘港台公器私用嘅投訴。助理廣播處長戴健文就重申，都係按照一般準則請陳太，否認有意煽動群眾上街。