中電近年對教育活動特別有興趣，好似香港小童群益會70周年，噚日喺尖東香港歷史博物館搞誌慶酒會，發布《童步成長路》特刊，就係由過咗百年大壽嘅中電贊助出版，呢啲活動又點少得中電常務董事阮蘇少媚。
原來佢細個住堅尼地城，屋企對面就係西環邨小童群益會，最鍾意喺圖書館打躉。佢話，小學嗰時開始睇《兒童樂園》，中學就煲《讀者文摘》，喪做雜誌入面嘅IQ題，可惜成日唔識做，仲一度懷疑自己低B。
佢話，嗰陣鍾意玩吓波子棋、飛行棋，但因為生得矮，「篤」康樂棋吓吓都要企櫈仔，非常麻煩，所以其他小朋友唔受佢玩。後來唔知食咗乜嘢，喺14歲時突然「標高」，似乎連少女情懷都突然開通。佢同華華講，全部情情塔塔嘅瓊瑤小說，佢16歲嗰陣用咗好短時間就刨晒，認真犀利！
阮太話，細個參加填色比賽，次次包辦最尾幾名，佢自嘲冇乜藝術細胞，估唔到大會今次竟然搵佢做幼兒繪畫比賽嘅頒獎嘉賓。