恒指波幅轉窄，高低相差只係67點，埋單仍有42點進賬。成份股最叻係招商局（144），收25.50元，升幅3.9%。招商局C輪，幾乎冇得炒，因為冇成交，4隻C輪得1隻有買賣，成交金額得2萬幾銀。9957與9958有唔細負溢價，理論上好抵買，但冇成交，睇中都係嘥氣。
港股一輪急彈之後，暫時會反覆，炒輪可採低買高沽策略。
中石油C輪3632：中石油（857）高低波幅0.20元，收8.45元，升1格。吼住回軟三兩格之時，買C輪3632，博反彈，實行密食當三番。
3632喺10月初夠鐘，輪價77仙，溢價2.4%，槓桿率11倍（有效7.5倍），引伸波幅29.5%。
新地C輪9209：新地（016）收79.25元，升0.10元，吼住回到78/78.50元，買C輪9209。
9209喺12月中夠鐘，輪價74仙，溢價5.2%，槓桿率10.7倍（有效6.6倍），引伸波幅28.1%。新地C輪中，呢隻數據算好標準。
東亞C輪3576：東亞（023）原地踏步，企喺31.85元。留意低買C輪3576，隻輪明年4月尾到期，輪價53仙，溢價4.6%，槓桿率6倍（有效4.3倍），引伸波幅32%，最理想係喺48仙上車。
章盛