法國分組賽頭兩場打到死吓死吓，要最後一場贏多哥先出線，點知可以喺淘汰賽先後打低之前長勝嘅西班牙同巴西；法國有另眼相看嘅表現，除咗用慢熱解釋，忽發奇想，會唔會係教練杜明尼治特登玩走線？
法國次名出線，好多人都以為佢哋死硬；不過心水清嘅都發現，西班牙同巴西喺往績上都輸蝕畀法國。西班牙喺正式比賽未贏過法國；巴西喺世界盃，亦都連續喺98年同86年輸畀法國；法國玩走線唔係冇可能，事關首名出線，8強對住意大利，過關都係五五波。
如果信法國真係走線，今次對葡萄牙又要追上盤。法國喺往績上又係食住葡萄牙，00年歐國盃準決賽，法國憑施丹黃金入球，擊敗葡萄牙晉級。葡萄牙今屆賽事贏在防守好，教練史高拉利當然有功，不過其實對手有好多缺點。上仗對住打少一個嘅英格蘭，講真具威脅埋門，英格蘭甚至較葡萄牙多；16強對荷蘭，又係對手門前把握力極差，先至保持不失，葡萄牙後防好只係假象，喺小弟心目中，葡軍中堅卡維奴始終係計時炸彈。
入球細1.4倍穩陣
初盤法國讓平/半，屬半個盤博一個盤格局；事關法國後防愈打愈有信心，連大細哨都可以全場無啖好食，以葡萄牙前鋒保列達級數，想入波真係咪玩啦；而且預期上仗激戰120分鐘嘅葡萄牙，今場打法比較保守，睇吓法國幾時攻入葡萄牙啫。
如果覺得上下盤風險大，入球細係更加穩定嘅選擇；法國同葡萄牙今屆打落，都係以守為攻格局，中場線壓迫力多。入球細只得1.4倍，如果唔貪心嘅話，嗰4成回報，應該都幾穩陣。
文：牽牛