坊間有啲人話，政府監管咗地產代理咁多年，仍然有唔少針對代理嘅投訴，似乎失敗咗啲。不過，以偏蓋全或者先入為主嘅觀念，去評價整個行業就唔係咁公平。
事實上，不論大中小代理行，為咗提升專業形象，咁多年嚟都落咗唔少工夫，好似香港置業咁，今個月會大搞員工表現調查，表現好嘅有現金獎，低分嘅會接受再教育，用獎善罰惡去提升員工服務質素。
港置董事楊彩鳳話，今次佢哋會用客戶問卷調查、神秘顧客調查，同埋電話抽樣訪問，評核前線員工嘅專業形象、推銷技巧同主動性等等。計劃會分階段進行，先係個人組別，跟住會係分行組別，唔同階段嘅最高分者，有現金獎賞，綜合計數最高分嘅，會得到團隊大獎。
有獎自然有罰，評分最低嘅一班同事，要參加特別班，進行再教育式特訓。