今晚葡萄牙大戰法國，我認為法國隊有能力在90分鐘內解決葡萄牙，吼2.05倍客勝以及4.6倍「和/客」。
法國勝在大賽經驗好，陣中主將都能夠發揮水準，中場韋拉同馬基列尼嘅配搭，連續3場有好表現，西班牙同巴西都搶輸畀佢兩個。
對南韓時，人人以為施丹英雄遲暮，入到淘汰賽，竟然係踢到曉飛！狀態提升嘅時間啱啱好。新人列貝利由多哥一役開始踢出信心，近兩場已經迅速融入球隊中，相比佢第1仗出賽對瑞士時嘅怯場表現，直頭係判若兩人。基本上，每位球員都有上佳水準，只要杜明尼治唔好再亂換人，繼續畀班球員自由發揮，法國隊嘅前景依然樂觀。
迪高復出又如何？
葡萄牙今仗有迪高同哥斯天拿停賽後復出，不過佢哋最近兩仗唔多唔少要靠啲拖延時間或惹嬲對手嘅茅招，其實葡軍從16強開始，踢起來已經冇乜說服力。葡萄牙對荷蘭時大部份時間踢少個，再加埋上場成堆老將搏足120分鐘，體力上有好大疑問！要喺90分鐘內面對踢得較為整體、以及愈踢愈順嘅法國，要闖過呢一關，真係唔容易。
阿聲
有線球彩台「06世界Bar」主持
今日播映時間：7:00pm-5:30am
PHONE波熱線：1831678