有線直擊隊星期二去咗柏林採訪小型世界盃，香港都有參加，仲打入最後8強，都算可喜可賀。
今次小型世界盃喺足球主題公園舉行，其實每屆世界盃都有足球主題公園畀球迷入場玩吓，不過今年嘅氣氛就特別好，原因可能同德國人熱愛足球嘅傳統有關，參與者玩嘅時候都特別投入。足球公園基本上分為3個部份，第1部份係用嚟比賽嘅球場，1人、3人同5人場加加埋埋差唔多有成10幾個，由於採訪當日有比賽舉行，所以遊客暫時唔可以喺度踢波。
有攤位遊戲有波睇
另一個部份係足球攤位遊戲，項目包括頂頭槌、射龍門、盤球、控球、凌空抽射等等，幾乎有關足球場內嘅動作遊戲，呢度都可以搵得到。最後一部份就比較特別，係一個小型球場，佢嘅外形設計其實同柏林奧林匹克球場一模一樣，入面都係有座位、有草地，不過規模當然細好多，最多只容納6、7百人左右。呢個小型奧林匹克球場，其實係用嚟進行5人比賽嘅，入面仲有部大電視，如果當日有比賽進行，觀眾可以免費入場睇波。至於遇正世界盃賽事上演，大電視更加會直播賽事，不過呢個時候球迷就要購票入場，每張入場券要大約3歐元，都算幾抵嘅。
正式嘅世界盃入場券有黃牛價，原來小型奧林匹克球場嘅睇波飛都會被炒起，好似決賽當日就已經升到成50歐元，要成5百幾蚊港幣，咁貴入場都只係睇電視直播，值唔值就真係見仁見智。
有線06世界盃嘉年華，將於今晚11:30pm——1:30am，播出世盃外景隊採訪滙報