友人來電，語調興奮：「有好嘢益你，不過時間非常緊迫，唔知你有冇興趣兼有冇時間？」鋪咗咁耐又神神秘秘，究竟有乜好嘢？唔該快啲講。「冇，正話收到有人去唔到德國睇準決賽，又唔想嘥咗啲波飛，所以問吓你唔知啱唔啱啫？」吓？有啲咁嘅事？梗係有興趣，先畀啲時間我上網check一check仲有冇機票酒店先。
由於時間緊迫，平價機票已通通沽清，逐間航空公司查詢，總算搵到有機位兼價錢可以接受，先訂位，未可confirm住，因為要搵酒店。對德國人生路不熟，幸好從世界盃網頁可連結到酒店網頁，知道球場附近有甚麼選擇，但大部份已客滿，皇天不負有心人，找到一間距離球場二十分鐘車程的酒店尚餘一間房間，但價錢偏貴，當機立斷從另一個專門以折扣訂房的網頁查詢，果然可以得到一個較優惠價錢，入場券、機票與酒店均已有着落，但全部未confirm，因為一confirm便要一齊confirm，否則求其缺一樣也是徒然。世界盃入場券除了認券之外還需輸入個人資料於入場時辨別身份，於是在手電中向友人講資料，另外用兩部電腦同時confirm機票及酒店，一分鐘後，得到的答案是全部confirmed，可以成行。
今日唔知聽日事，一切決定只發生在幾小時，大家看到這篇文字時我應已到了德國，正在大唱OLEOLEOLEOLE……